De Oude Westhof
Van Kronendal tot Oude Westhof
Pieter Van Der Westhuizen, van Brugge in Vlaandere, kom na die Kaap as
soldaat voor 1662. Pieter word al reeds ‘n vryburger op die 18 de Januarie
1662, 10 jaar na Jan Van Riebeeck se koms, en is die stamvader van die Van
Der Westhuizens. Hy tree in die huwelike met Maria Hendriks Winkelhausen van
Duitse oorsprong
As gevolg van die oorlog tussen Nederland en Frankryk was daar ‘n skaarste aan koring en die Politieke raad het besluit om ook vryburgers te vestig in die Houtbaai-vallei. Op 23 Maart 1677 ontvang Pieter Van der Westhuizen en Willem Schalk (Van Der Merwe), stamvader van die Van Der Merwes, die reg om te boer. Hulle moes koring plant en as betaling vir die huur van die grond en een tiende van die opbrengs gee aan die Kompanjie. Hulle het maar baie swaar gekry het om die braak lande te bewerk en om hulle lewende hawe te beskerm van wilde diere. Teen 1781 gooi hulle handdoek in en gaan terug na Tafelbaai. Op 29 Desember 1681 word die grond as ‘n vrypagplaas, later beken as Kronendal, aan Pieter en ‘n nuwe vennoot, Willem van Dieden gegee. Die pragtige historiese Kronendal opstal is vandag ‘n bekende baken op Houtbaai en is heel waarskynlik op die ou fondamente van Pieter se huis gebou. Pieter verkoop Kronendal aan sy vennoot in 1683 en na vele transaksies in Tafelbaai boer hy voort in die Tygerberge.
Pieter ontvang die vrypag plaas, De Oude Westhof in die Tygerberge, op 9 Februarie 1702. In 1714 verkry hy ook die plaas Elsieskraal (Gebied vanaf Bellville Velodrome tot die A vd Walt aftree-oord. Pieter sterf in 1721 op rype ouderdom van ongeveer 80 jaar. Sy nageslag het diep spore gelaat in die Tygerberge.
Bronne:
Die Groot Afrikaanse Familienaamboek, C Pama, Human en Rousseau
Die Buite Poste, D Sleigh, pp. 268-269, Pretoria Boekhuis, 2004
Die Tygerberg, NM Du Plessis, Tafelberg-Uitgewers,1998
Die Walters-diaspora en familieboek, NM Walters, 2004
Kaart: Kaapse Argiewe